Cuorta distanza plinengiu suenter il dutg sesanfla in baghetg cun ina dimensiun plitost liunga. Encunter la fassada occidentala dattan duas rodas d’aua aunc a nus en egl. Lemprema da quellas ei la roda d aua per la resgia. Quella era en possess privat. Ils indrezs da resgiar mauncan ussa e consequentamein sa la resgia buca pli esser en funcziun. La roda ch ei oz en in stan demolau surveva per metter en moviment la resgia construida entuorn ils anno 1850. Sco gia menziunau deva ei denter nos perdavons capavels lennaris e scrinaris. Per saver
resgiar orda blocca liungas aissas, han ins construiu in baghetg adattau persuenter. Lucas Monn, morts igl onn 1952, ei staus il davos possessur dalla resgia. Ils pli vegls da Disla seregordan aunc dallas rasenas blocca che vegnevan transportadas neutier e s’emplunadas avon la resgia. In resgiader indigen resgiava la lenna tier aissas e quaders. Ei vegn era raquintau, ch ei devi da quei temps a Disla in scrinari-artist che fabricavi puffens e scaffas, construevi bials tablegiai en casas ed entagliavi mobiglias orda lenn. Probabel saveva el retrer aissas e quaders da quella resgia.
