L’aua dil dutg flessegia traversond ils bials praus da Pardieni ed arriva tier in pign baghetg. Quei duess esser stau il mulinet activaus medemamein dall’aua dil dutg. Las molas-crap stattan aunc uss el funs dil baghetg, ferton che la roda dil mulin maunca. Da quei mulinet havevien mo certas famiglias dretg, sco p.ex. Manetschs, Berthers e Bundis. Per buca schar ir quei edifeci en emblidonza, ha igl actual possessur sanau dacuort il tetg sco era ils mirs. Aschia stat quel sco ina perdetga dil temps vargau, cura ch el surveva sco mulinet.